Германскиот автомобилски клуб ADAC ги предупредува возачите да ги наполнат резервоарите додека цените на горивата се во пораст поради ескалацијата меѓу Израел и Иран.
По израелскиот напад врз иранската нуклеарна програма, цените на суровата нафта и природниот гас значително се зголемија. Во Германија, бензинот и дизелот веќе поскапеа за неколку центи по литар само за еден ден, а ADAC очекува трендот да продолжи.
Портпаролот на клубот изјави дека нафтените компании брзо ќе ги пренесат повисоките цени до потрошувачите. Цената на барел Брент нафта скокна од околу 69 на 75 долари.
Состојбата на Блискиот Исток носи неизвесност, а можна е блокада на важни нафтени патеки, како Ормутскиот теснец, што дополнително би го зголемило притисокот врз снабдувањето и цените.
Возачите се советуваат да го полнат горивото навечер, кога е поевтино, и да бидат подготвени за раст на цените.
Берзите реагираа со умерени падови, а златото и државните обврзници станаа посакувани како безбедна инвестиција. Во меѓувреме, воздушниот и морскиот сообраќај во регионот се соочуваат со ограничувања и загриженост за безбедноста на транспортот.
