Бугарскиот парламент во петокот усвои закон кој овозможува државата да преземе директна контрола врз рафинеријата на руската компанија „Лукоил“ во Бургас, најголемата нафтена рафинерија на Балканот.
Со новите измени, владата може да именува државен специјален администратор кој ќе управува со работењето на компанијата доколку се оцени дека постои ризик по националната или енергетската безбедност. Мерката следува по воведувањето нови санкции од САД против „Лукоил“ и поврзаните компании, кои предизвикаа загриженост во Софија за стабилноста на снабдувањето со гориво.
Бугарската влада појаснува дека законот не значи национализација, туку претставува заштитна мерка која ќе се активира само ако работењето на рафинеријата биде загрозено. Државниот администратор ќе има право да гласа во име на акционерите, да управува со средствата, па дури и да предложи продажба или преструктурирање на делови од компанијата доколку е потребно.
Рафинеријата „Лукоил Нефтохим Бургас“ обезбедува најголем дел од горивото за домашниот пазар и има значајна улога во извозот кон соседните земји. Софија нагласува дека стабилното работење на рафинеријата е од „стратешко значење“, особено во контекст на енергетската криза и санкциите против Русија.
Со овој потег, Бугарија се приклучува на европските земји кои преземаат зголемена контрола врз критичната енергетска инфраструктура поврзана со Русија, со цел намалување на зависноста и зајакнување на енергетската безбедност.
