Научници од Австралија и Нов Зеланд дојдоа до извонредно откритие во пештера недалеку од Ваитомо на Северниот Остров на Нов Зеланд. Тие пронајдоа остатоци од древни птици и жаби кои живееле пред околу милион години, вклучувајќи и досега непознат роднина на култниот какапо. Ова е прва голема колекција на фосили од копнени ’рбетници од тој период во историјата на Нов Зеланд, која дава невиден увид во одамна исчезнатиот екосистем.
„Ова е оној дел од историјата што недостасуваше“ Научници открија нов вид диносаурус: Со големина е на пиле и можеби го менува досегашното разбирање на еволуцијата
Истражувањето објавено во списанието „Alcheringa: An Australasian Journal of Palaeontology“ покажува дека дивиот свет на Нов Зеланд доживеал драматични промени многу пред појавата на човекот. Силните вулкански ерупции и брзите климатски промени повеќепати ги менувале живеалиштата, предизвикувајќи масовни изумирања и отворајќи можности за еволуција на нови видови.
Древни птици изгубени во времето
Главниот автор на студијата, вонредниот професор Тревор Ворти од Универзитетот Флиндерс, истакнува дека фосилите откриваат птичја заедница која воопшто не наликува на онаа што денес можеме да ја видиме на Нов Зеланд.
„Ова е новопрепознаена орнитофауна на Нов Зеланд, која била заменета со онаа со која луѓето се соочиле милион години подоцна. Ова исклучително откритие сугерира дека нашите древни шуми некогаш биле дом на разновидна група птици кои не го преживеале следниот милион години“, изјави тој.
Според проценките на истражувачите, меѓу 33 и 50 отсто од видовите изумреле милион години пред луѓето да пристигнат во Аотеароа (официјалното име на маорски јазик за Нов Зеланд).
Вулканите и климатските промени ги измениле екосистемите
Научниците сметаат дека тие загуби главно биле предизвикани од природни катастрофи.
- „Тие изумирања се предизвикани од релативно брзи климатски промени и катастрофални вулкански ерупции“, изјави коавторот на истражувањето д-р Пол Скофилд, виш кустос за природна историја во Музејот во Кентербери.
Откритието помогна да се пополни една од најголемите празнини во фосилниот запис на Нов Зеланд. Едно од највозбудливите пронајдоци е новиот вид папагал наречен Strigops insulaborealis. Тоа е древен роднина на какапото – една од најпознатите птици на Нов Зеланд.
Денес, какапото е единствениот папагал во светот што не лета. Меѓутоа, анализата на фосилните коски покажува дека древниот предок имал послаби нозе од современиот какапо. Истражувачите сметаат дека древниот вид веројатно помалку се качувал по дрвјата и ја задржал способноста за летање.
Геолошки „сендвич“ кој ја открива староста
Во пештерата исто така се пронајдени фосили од изумрен предок на такехето и изумрен вид гулаб, близок до австралиските гулаби со бронзени крилја.
Научниците успеале да ја одредат староста на наоѓалиштето со необична прецизност. Фосилите биле заробени меѓу два слоја вулкански пепел во внатрешноста на пештерата:
- Едниот слој пепел настанал со ерупција пред околу 1,55 милиони години.
- Другиот слој настанал со силна ерупција пред приближно милион години.
Овој природен геолошки „сендвич“ обезбедува јасни временски рамки.
Професорот Ворти тврди дека фосилите претставуваат „исклучително важен основен слој што недостасуваше во природната историја на Нов Зеланд“. Долги години научниците главно се фокусираа на еколошките промени што настанаа по доаѓањето на луѓето на Нов Зеланд пред околу 750 години. Новите податоци докажуваат дека силните природни сили, како што се супервулканите и драматичните климатски промени, веќе го обликувале уникатниот идентитет на дивиот свет пред повеќе од милион години.
