Двајца 24-годишни мажи се приведени во Белград под сомнение дека брутално нападнале таксист, кого го претепале, противправно го лишиле од слобода, го ограбиле и неовластено го користеле неговото возило.
Според Првото основно јавно обвинителство во Белград, на осомничените им е одреден 48-часовен притвор поради сомнение дека извршиле повеќе кривични дела, меѓу кои противправно лишување од слобода, тешка телесна повреда, тешка кражба и неовластено користење туѓо моторно возило.
Според истрагата, инцидентот се случил на 16 февруари околу 1 часот по полноќ. Осомничените влегле во такси-возилото и првично побарале да бидат превезени до населбата Миријево. За време на возењето почнале физички да го напаѓаат 51-годишниот таксист, удирајќи го повеќепати по главата и телото.
Во текот на нападот, неколкупати го извлекувале од возилото, го шутирале, со сила ги оштетиле такси-рекламата и таксиметарот, а потоа без негова согласност управувале со возилото. Осомничените барале таксистот да ги однесе до Врање, а кога стигнале до Младеновац се премислиле и побарале да се вратат назад, продолжувајќи да го тепаат.
На крајот му го одзеле паричникот во кој имало лични документи и околу 20.000 динари.
Обвинителството наведува дека таксистот се здобил со тешки телесни повреди. Еден од осомничените се бранел со молчење, додека другиот ги негирал обвиненијата.
Јавниот обвинител предложил на двајцата да им биде одреден притвор поради опасност од влијание врз сведоци и можност да го повторат кривичното дело. Истрагата продолжува.
