Полицијата во Цетиње уапси брачен пар поради сомнение дека во период од неколку години злоставувал и искористувал три малолетни деца кои биле сместени кај нив како во згрижувачко семејство.
Станува збор за сопружниците Ш.К. и А.С., кои се осомничени за кривични дела трговија со луѓе и семејно насилство врз деца на возраст од осум, 13 и 15 години.
Според информациите од полицијата, малолетниците биле сместени кај брачниот пар врз основа на одлука на Центарот за социјална работа, а сомневањата се дека злоставувањето траело од јануари 2022 година.
Истрагата покажала дека децата биле изложени на физичко и психичко насилство, а со закани биле принудувани да молчат за она што се случувало во домот.
Особено тешки се сомневањата поврзани со 15-годишното момче. Според полицијата, тоа било принудувано да работи во угостителски објекти и приватни домови, со цел да се плаќаат долгови и да се стекнува материјална корист. Притоа, на момчето му било ускратено и правото на образование.
Помладите деца, пак, наводно биле користени за чување внуци и извршување домашни работи.
Осомничените се лишени од слобода во координирана полициска акција и по наредба на државен обвинител при Вишото државно обвинителство во Подгорица.
Трите деца се згрижени на безбедна локација, каде им е обезбедена соодветна поддршка, додека надлежните ја продолжуваат истрагата.
