На социјалните мрежи се појави ново вознемирувачко видео што го прикажува моментот кога рускиот хеликоптер Ка-226 експлодира и падна врз куќа во Дагестан во петокот, пренесува британскиот „The Sun“.
Видеото, кое брзо се прошири на интернет, открива драматична реконструкција на трагедијата. Додека се обидувал да слета, пилотот прво со хеликоптерот удрил во пристаништето. Наместо да го исклучи моторот, тој се обидел повторно да го крене леталото, иако оштетената опашка очигледно висела и предизвикувала сериозен дисбаланс.
Хеликоптерот накратко успеал да се издигне, но пилотот се борел со контролата. Неколку секунди подоцна, машината почнала неконтролирано да се врти, губејќи стабилност, сè додека не се сруши на земја и не се претвори во огромна огнена топка, проголтувајќи ја куќата врз која паднала.
Според првичните извештаи на „The Sun“, четири лица изгореле живи, а тројца биле повредени. Но, медиумот „The Kyiv Independent“ наведува дека бројот на загинати изнесува петмина, меѓу кои и четворица вработени во фабриката КЕМЗ од Дагестан – компанија која произведува системи за контрола, дијагностика и техничка поддршка за руските авиони „Сухој“ и „МиГ“.
КЕМЗ во официјално соопштение потврди дека меѓу загинатите е и заменик-генералниот директор за градежна и транспортна поддршка. Важно е да се напомене дека оваа фабрика се наоѓа под американски санкции, поради нејзиното учество во руската воена индустрија.
Точната причина за катастрофата сè уште не е позната. Руската федерална агенција за цивилно воздухопловство, Росавијација, соопшти дека ќе спроведе детална истрага за да ги утврди околностите што довеле до падот на хеликоптерот и големата трагедија што следела.
