Три лица, меѓу кои две деца, загинаа во пожар што избувнал во станбена зграда во Малишева, Косово.
Според информациите од полицијата, инцидентот бил пријавен околу 12:55 часот во населбата „Мирдита“, по што на местото веднаш пристигнале полициски екипи, пожарникари и служби за итна помош.
Во објектот биле пронајдени едно возрасно лице и две деца – девојче и момче. Тие биле пренесени во Центарот за семејна медицина во Малишева, каде што лекарите констатирале смрт.
Пожарот бил локализиран, а според првичните информации од медиумите, причината за трагедијата е експлозија на плинска боца. Жртвите биле на возраст од 9, 12 и 35 години.
Надлежните институции работат на целосно утврдување на причините за несреќата.
