Шест случаи на исчезнати лица биле пријавени на Косово во текот на изминатата недела, меѓу кои има и малолетни девојчиња. Полицијата ги истражува околностите, а засега нема докази дека случаите се меѓусебно поврзани.
Еден од пријавените случаи е исчезнувањето на 54-годишниот Авди Ќуни од Ѓаковица, кој на 13 октомври, околу 7 часот наутро, го напуштил својот дом и оттогаш неговото семејство нема информации каде се наоѓа.
Неговата сопруга изјавила дека исчезнувањето можеби е поврзано со финансиски проблеми и долгови. Според неа, Ќуни немал мобилен телефон со себе, што дополнително ја отежнува потрагата.
На 16 октомври биле пријавени уште неколку исчезнувања.
Во Глоговац татко пријавил дека неговата ќерка излегла од дома и не се вратила, додека во Вучитрн брат пријавил исчезнување на својата сестра.
Особено загрижувачки е случајот со две малолетни девојчиња од селото Горњи Ливоч кај Гњилане.
Нивните семејства пријавиле дека девојчињата заедно излегле од дома, по што им се изгубила секаква трага.
Полицијата не објавила информации за нивната возраст, идентитетите или околностите на исчезнувањето.
Во истиот период бил пријавен и исчезнат маж од Косово Поле.
Косовските власти продолжуваат со потрагите и истрагите, додека семејствата очекуваат информации за своите најблиски.
Засега нема потврда дека шесте исчезнувања се поврзани или дека зад нив стои заедничка причина.
