Легендарниот американски вокалист Peabo Bryson почина на 75-годишна возраст, откако претрпел мозочен удар, соопшти неговото семејство преку емотивна изјава која ја потресе светската музичка јавност.
Според информациите, Брајсон починал во вторникот, а неговото здравје во последните години било нарушено. Тој претходно во 2019 година доживеал срцев удар, од кој успеал да се опорави, но подоцнежните компликации се покажале фатални.
Веста за неговата смрт ја објави семејството, кое во своето соопштение истакна колку голема трага оставил зад себе, не само како уметник, туку и како човек кој допрел милиони животи.
Во пораката се наведува дека и покрај огромната болка, утеха наоѓаат во тоа што неговиот глас и уметноста што ја создаваше биле сакани низ целиот свет и оставиле длабок белег кај публиката.
Peabo Bryson беше особено препознатлив по своите изведби на музика за анимирани филмови на Дизни, меѓу кои „Beauty and the Beast“ и „A Whole New World“ од „Аладин“, песни што со децении се сметаат за класики и симбол на романтичната филмска музика.
Неговата кариера траеше повеќе од 50 години, а семејството во својата порака истакна дека неговата музика била дел од најважните моменти во животот на многу луѓе – од љубовни приказни до моменти на радост и утеха.
Исто така беше нагласено дека неговото музичко наследство нема да згасне, туку ќе продолжи да живее преку генерациите што израснаа со неговите песни.
Со неговото заминување, музичката сцена губи еден од најпрепознатливите и најемотивни вокали на својата ера, додека неговите интерпретации остануваат како трајно наследство во светската музика.
