Никола Мартан (31) од Гола почина по речиси три месеци борба за живот, откако на почетокот на јули годинава беше тешко повреден во напад пред кафуле во Медулин, Хрватска.
Според информациите што ги објавува „Подравски лист“, Никола околу два месеца бил во кома. По тој период тој се разбудил и почнал да реагира на околината, но неговата здравствена состојба повторно се влошила.
Хрватската полиција уште минатата недела соопшти дека 31-годишниот маж, кој беше тешко повреден на 5 јули во Медулин, починал на 1 октомври во болницата во Пула. За неговата смрт било известено и надлежното државно обвинителство.
„Подравски“ сега открива дека починатиот е Никола Мартан од Гола. Тој во Истра заминал со својата мајка, каде што во текот на летото работел како келнер.
Кобната ноќ, по завршувањето на работата, Никола излегол на пијалак со двајца колеги, кои биле државјани на Србија. Според досегашните полициски информации, по кратка вербална расправија, 19-годишник го удрил Никола со тупаница во главата.
Од ударот Никола паднал на земја и се здобил со особено тешки повреди. Како што пренесува „Подравски“, при падот тој со главата удрил во работ на тротоарот, што дополнително придонело за сериозноста на повредите.
Нападот, сепак, не завршил тука. Осомничените продолжиле и кон двајцата колеги на Никола.
Според полицијата, еден 33-годишен државјанин на Србија бил нападнат од 19-годишник и 18-годишник, кои продолжиле да го удираат откако паднал на земја. Во исто време, друг 19-годишник соборил 24-годишен државјанин на Србија, по што сите тројца го удирале со раце и нозе по телото и главата.
Двајцата државјани на Србија во нападот се здобиле со полесни повреди.
Тројцата осомничени за нападот, двајца кои во тоа време имале по 19 години и еден 18-годишник, набрзо биле пронајдени од полицијата и уапсени.
Поради исклучително тешките повреди на главата, Никола бил ставен во индуцирана кома. Неговите пријатели за „Подравски“ раскажале дека лекарите подоцна се обиделе да го разбудат од индуцираната кома, но тој не се разбудил веднаш.
Според нивните сведоштва, Никола вкупно околу два месеца бил без свест. Иако подоцна се разбудил и започнал да реагира на она што се случува околу него, неговата состојба повторно се влошила.
По речиси три месеци од тешкиот напад, Никола ја загубил битката за живот. Тој починал на 1 октомври во болницата во Пула, а за трагичниот исход биле известени надлежните обвинителски органи.
