Сериозен безбедносен пропуст во Данска предизвика загриженост откако неовластено лице наводно успеало да пристапи до лични податоци на 8,8 милиони луѓе користејќи ја едноставната лозинка „123456“.
Случајот е поврзан со данската информатичка компанија „Pays ApS“, која имала овластен пристап до централниот регистар на населението, познат како CPR.
Според објавените информации, биле достапни имиња, адреси, матични броеви и други лични податоци.
Лицето што ја презело одговорноста за упадот тврди дека до системот пристапило благодарение на слабата лозинка, која наводно ја користеле најмалку три кориснички сметки во компанијата, вклучително и една администраторска.
Данските власти потврдиле злоупотреба на легитимниот пристап до регистарот, но деталите за начинот на пробивање сè уште се предмет на истрага.
Според документите објавени од данските медиуми, напаѓачот добил пристап на 10 септември, а до 20 септември извршил околу 14 милиони автоматизирани пребарувања.
Необичната активност била забележана на 2 октомври, по проверка на фактура со невообичаено голем број барања.
Од вкупно 8,8 милиони засегнати записи, приближно 5,5 милиони се однесуваат на живи лица, а 3,3 милиони на починати.
Лицето што тврди дека стои зад упадот изјавило дека нема намера да ги продава или јавно да ги објавува преземените информации.
По откривањето на случајот, пристапот на компанијата до државниот регистар бил прекинат, а известени биле институциите задолжени за заштита на личните податоци.
Полицијата започнала истрага за утврдување на сите околности.
Случајот повторно го отвора прашањето за заштитата на чувствителните информации и опасностите од користење едноставни лозинки во системи што содржат милиони лични записи.
