Паника и хаос ја зафатија вечерва централната зона на Антверпен, откако напад со нож се случи на плоштадот пред Операта, токму во момент кога таму се одржувал јавен протест. Во инцидентот се повредени шест лица, од кои две се во животна опасност, соопшти локалната полиција.
Според официјалните информации, сите жртви имаат убодни рани. Четворица од повредените биле пронајдени директно на плоштадот, додека уште две лица биле нападнати во блиските улици, што дополнително ја зголемило вознемиреноста кај граѓаните.
Полицијата реагирала брзо и успеала да приведе двајца осомничени, за кои се верува дека се вмешале меѓу демонстрантите пред да го извршат нападот. Според првичните сознанија, тие биле дел од масата за да не бидат забележани.
На местото веднаш пристигнале повеќе медицински екипи, кои им пружиле итна помош на повредените, по што тие биле пренесени во болница. Областа околу Операта била делумно блокирана, а присутните биле евакуирани.
Засега не се откриваат мотивите за нападот, ниту дали станува збор за организиран инцидент. Белгиската полиција соопшти дека е започната детална истрага, вклучително и форензичка анализа на местото на настанот.
Инцидентот повторно ја отвори загриженоста за безбедноста на јавните собири во Европа.
