Двајца пилоти на британското Кралско воено воздухопловство (РАФ) успеале да се катапултираат само неколку моменти пред нивниот воен авион да се урне во Северен Велс.
Инцидентот се случил во близина на Пенкарнисиог, на островот Англси, недалеку од воената база РАФ Вали. Станува збор за тренажен авион „Хок Т2“, кој паднал кратко по полетувањето.
Според првичните информации, двајцата пилоти навреме се катапултирале, а нивните падобрани успешно се отвориле. Полицијата во Северен Велс соопштила дека пилотите се здобиле со повреди за кои се верува дека не се сериозни. Нема информации за други повредени лица.
Очевидец кој го следел полетувањето изјавил дека уште на почетокот забележал нешто невообичаено. Според неговото сведоштво, од авионот се појавил портокалов пламен, по што леталото почнало нагло да се движи.
Набргу потоа се слушнале два силни удари, пилотите се катапултирале, а авионот паднал и се запалил. Од местото на несреќата се издигнал густ црн чад.
На терен биле испратени полициски, противпожарни и медицински екипи, како и воздушна брза помош.
Од РАФ потврдиле дека станува збор за инцидент со „Хок Т2“ кој полетал од базата РАФ Вали. Отворена е истрага што треба да утврди што точно довело до падот на авионот.
