Драматична полициска операција се одвива во грчкиот град Никеја, каде маж се затворил во куќа заедно со својата сопруга и, според првичните информации, не ѝ дозволува да излезе.
Случајот се одвива во куќа на улицата „Софоклеус“, а грчките медиуми јавуваат дека станува збор за инцидент поврзан со семејно насилство.
На местото се распоредени полициски сили кои го обезбедуваат поширокиот простор и се обидуваат ситуацијата да ја разрешат безбедно.
Според досегашните информации, мажот тврди дека поседува оружје. Полицијата засега нема потврдено дали тој навистина е вооружен, поради што службите постапуваат со зголемена претпазливост.
Поради интервенцијата, сообраќајот во дел од околните улици е прекинат. Засега нема официјални информации за здравствената состојба на жената.
Случајот сè уште е во тек и се очекуваат дополнителни информации од грчките власти.
