Организираните криминални групи во Србија и регионот сè почесто регрутираат малолетници за извршување тешки кривични дела, вклучително и нарачани убиства. Според полициски информации изнесени во српските медиуми, криминалните кланови користат деца на возраст од 13 до 16 години, кои претходно не биле евидентирани во полициските досиеја.
Особено загрижува податокот дека во Србија биле идентификувани најмалку 16 млади лица донесени од Северна Македонија со цел да учествуваат во ликвидации. Во исто време, бројот на кривични пријави против малолетници во Србија достигнал речиси 3.000 годишно, што е неколкукратно повеќе во споредба со периодот пред само неколку години.
За начинот на кој криминалните групи ги вовлекуваат децата во светот на криминалот, во емисија на „Блиц ТВ“ зборувале полицискиот полковник Милан Миловиќ, координатор за обука на припадници на МВР на Србија, и специјалниот педагог и психотерапевт Дамир Наглиќ.
Миловиќ објаснува дека клановите најпрво ги вклучуваат малолетниците во помали активности, како улична продажба на дрога. Потоа намерно им создаваат долгови за поголеми количества кокаин, кои децата не можат да ги исплатат. Кога ќе се најдат во таква ситуација, криминалните водачи наводно ги уценуваат и ги принудуваат да извршуваат потешки кривични дела, вклучително и убиства, ветувајќи им дека на тој начин долгот ќе им биде избришан.
Според неговите предупредувања, дополнителна опасност е тоа што малолетниците најчесто немаат никаква обука за ракување со огнено оружје или експлозивни направи. Поради тоа, при ваквите акции може да настрадаат и случајни минувачи.
Полицискиот полковник посочува дека криминалните групи намерно избираат деца од соседни држави, меѓу кои и Северна Македонија, бидејќи тие не се познати на безбедносните служби во земјата каде што треба да се изврши кривичното дело. Нивната младост и отсуството на полициско досие им овозможуваат полесно да поминат незабележано.
Тој предупредува дека криминалните водачи ги користат малолетниците и затоа што, дури и кога ќе бидат фатени, тие често немаат информации за вистинските нарачатели и организатори на делото.
Специјалниот педагог и психотерапевт Дамир Наглиќ објаснува дека децата во пубертет се особено подложни на вакви влијанија поради нивниот недовршен когнитивен и емоционален развој. Според него, тие сè уште немаат целосно развиена свест за последиците од своите постапки, ниту доволно изградена критичка процена.
Дополнителен ризик постои кај децата кои не чувствуваат сигурност и припадност во семејството или училиштето. Криминалните групи ја искористуваат таа празнина, нудејќи им лажно чувство на важност, прифатеност и независност.
Податоците изнесени во емисијата покажуваат дека во Србија во текот на една година биле поднесени 2.743 кривични пријави против лица на возраст од 14 до 18 години. Во учебната 2020/2021 година, според споредбените податоци, бројот се движел меѓу 700 и 800 пријави.
Наглиќ смета дека е неопходна поголема посветеност на превенцијата и ресоцијализацијата. Тој предупредува дека младите преку филмови и серии за криминалниот свет понекогаш добиваат искривена претстава дека криминалот носи лесен живот, пари и углед.
Според него, важно е децата кои ќе направат грешка да добијат можност за навремена помош и ресоцијализација, наместо веднаш да бидат препуштени на криминалната средина и ризикот трајно да се вовлечат во неа.






