Повеќе од 400 туристи и локални жители се евакуирани по морски пат од делови на Халкидики, откако голем шумски пожар ги зафати подрачјата околу Сивири и Фурка.
Според објавените информации, досега 347 лица биле безбедно транспортирани до марината Сани, додека уште околу 92 лица се качиле на патничкиот брод „Speedrunner Jet“.
Во операцијата се вклучени пловила на крајбрежната стража, противпожарната служба, приватни бродови и други патнички пловила, кои ги префрлаат граѓаните и туристите подалеку од загрозените подрачја.
Паралелно со евакуацијата по море, организиран е и транспорт по копнен пат. Автобуси се упатени кон Сивири и Фурка за да ги преземат лицата кои треба да ја напуштат зоната зафатена од пожарот.
Надлежните служби продолжуваат со операцијата, додека пожарникарските екипи се обидуваат да го стават огнот под контрола.
На сите кои се наоѓаат во поширокото подрачје им се препорачува да ги следат официјалните предупредувања и без одложување да ги почитуваат евентуалните наредби за евакуација.
