Британски државјанин доби условна казна од две години откако се обидел да продаде лажни антички статуи преку престижната аукциска куќа „Сотбис“. Станува збор за Ендру Кроули (46) од Глостершир, кој тврдел дека вредните артефакти ги наследил од својот дедо и дека тие имаат значајна историска и финансиска вредност.
Кроули се обратил до експертите на аукциската куќа со барање за проценка на три кикладски фигури од Грција, како и една анадолска статуа позната како „ѕвездест набљудувач“. Според обвинителството, доколку предметите биле автентични, нивната вредност би достигнала околу 680.000 фунти. Сепак, судот ја намалил оваа проценка на 340.000 фунти, нагласувајќи дека таа се базира на претпоставки.
Со цел да ја потврди нивната наводна автентичност, Кроули приложил документи кои требало да потекнуваат од 1976 година, вклучително и фактури испечатени на хартија со лого на трговец со антиквитети и соодветна поштенска марка. Но, форензичката анализа открила дека документите се изработени со современи техники на печатење, кои не постоеле во времето што тој го наведувал.
Дополнително, експертите од „Сотбис“ забележале бројни правописни грешки во документите, што уште повеќе ја потврдило нивната неавтентичност. Судот го оцени обидот како „несмасен“, посочувајќи дека измамата била брзо откриена.
Иако судот прифатил дека Кроули можеби не знаел дека самите статуи се лажни, утврдено е дека свесно фалсификувал документација. Освен условната казна, му е наложено да изврши 200 часа општествено корисна работа и да ги покрие судските трошоци.
