Седум лица се уапсени во голема полициска акција во Србија поради сомневање дека биле дел од организирана криминална група поврзана со две убиства, киднапирање и други тешки кривични дела.
Особено внимание привлекува информацијата дека меѓу осомничените се наоѓа и лице со иницијали М. С., кое моментално е во затвор во Македонија.
Според соопштението на Јавното обвинителство за организиран криминал на Србија, со кривичната пријава се опфатени вкупно 12 лица, од кои седум се уапсени во Србија.
Групата се сомничи дека стои зад убиствата на Милан Стоковиќ во областа на Пожаревац и Живко Бакиќ во Белград.
Стоковиќ бил киднапиран на 14 октомври 2025 година, додека Бакиќ бил убиен во јануари 2026 година.
Меѓу приведените се шест лица од Белград и едно од Пожаревац.
Во акцијата учествувале повеќе специјализирани полициски единици, меѓу кои Службата за борба против организираниот криминал, Жандармеријата, Специјалната антитерористичка единица и Безбедносно-информативната агенција.
Покрај лицето кое е во затвор во Македонија, меѓу осомничените има и едно лице во притвор во Белград, две лица во притвор во Грција и Белгија, како и едно лице кое е во бегство.
Српското обвинителство не соопштило во кој македонски затвор се наоѓа М. С., ниту за кое кривично дело ја издржува затворската казна.
Осомничените се товарат за криминално здружување, тешко убиство, киднапирање, незаконско поседување и трговија со оружје и експлозивни материи, како и трговија со дрога.
По истекот на полициското задржување, уапсените ќе бидат изведени на сослушување пред надлежното обвинителство.
Истрагата продолжува, а кривичната одговорност на осомничените допрва треба да биде утврдена во судска постапка.
