Д.Е. (36) од скопско пријавил во полиција дека бил физички нападнат и против своја волја однесен од неколку лица, при што се здобил со тешки телесни повреди.
Според информациите од Министерството за внатрешни работи, на 12 јуни во 21:30 часот во СВР Скопје, тој пријавил дека истиот ден околу 14:00 часот на подрачјето на Карпош бил пресретнат додека се движел со патничко возило „Мерцедес“.
Во пријавата се наведува дека бил пресретнат од три возила – „Хјундаи“, „Фолксваген Тигуан“ и „Фолксваген Пасат“, управувани од лица со иницијали Р.Б., М.Б. и Б.Б.
Според неговото сведочење, едно од лицата физички го нападнало и му нанело тешки телесни повреди, по што наводно бил ставен во возило и однесен на повеќе локации, меѓу кои и автоплац во Карпош, а потоа бил оставен во селото Шишево.
Од Министерството за внатрешни работи информираат дека се преземаат мерки за целосно расчистување на случајот и утврдување на сите околности.
Истрагата е во тек.
