Бројот на загинати по страшниот пожар во дом за стари лица во Тузла се искачи на 12, откако едно лице со тешки повреди подлегнало во болница, пренесува „Дневни аваз“.
Во пожарот што изби вчера, 11 жители на домот го загубија животот, најчесто од изгореници и труење со јаглерод моноксид, а 35 лица побараа медицинска помош. Четворица беа во критична состојба и приклучени на респиратори, но еден од нив не успеа да преживее.
Истражните органи под лупа ја испитуваат трагедијата
Градоначалникот на Тузла, Зијад Лугавиќ, најави дека ќе се спроведе темелна истрага за причините за пожарот, со јасна порака дека сите одговорни ќе мора да одговараат.
Премиерот на Федерацијата Босна и Херцеговина, Нермин Никшиќ, изјави дека спасувачките служби реагирале професионално, но потврди дека зградата била претходно означена како потенцијално опасна.
„Противпожарната служба веќе имала проценка дека овој објект е ризичен, одржала вежби и обучила вработени. Сепак, трагедијата не била спречена“, изјави Никшиќ.
Оставка и ветување за помош
Директорот на домот, Мирсад Бакаловиќ, поднел оставка, што премиерот го оцени како морален чин, но нагласи дека тоа не значи автоматска вина.
Владата најави дека ќе се погрижи за сместување на сите преживеани жители и ќе обезбеди поддршка за семејствата на загинатите.
