На француско-шпанската граница бил уапсен мотоциклист кој пренесувал голема количина кокаин, скриена во куфери прицврстени на неговиот мотор. Според информациите од царинските власти во Перпињан, запленети биле вкупно 71,5 килограми дрога.
Инцидентот се случил на 11 мај, за време на рутинска контрола на наплатна рампа во близина на границата. Возачот управувал мотор со шпански регистарски таблички и при проверката се претставил како шпански државјанин, иако приложил српска лична карта.
При детална контрола, службениците пронашле повеќе пакети со кокаин во страничните куфери, задниот дел на моторот и во дополнителна торба. Количината и начинот на транспорт го прават овој случај еден од најголемите откриени шверцови на дрога со мотоцикл во Франција.
По апсењето, лицето било изведено пред суд во Перпињан, каде му била изречена казна затвор од пет години. Покрај тоа, му е наложена и парична казна од 3,5 милиони евра, како и забрана за влез во Франција во наредните десет години.
Надлежните истакнуваат дека ваквите случаи покажуваат дека шверцерите користат сè поиновативни методи за транспорт на дрога.
