Околу 50 жители на украинско село во Сумската област на североистокот на Украина биле насилно одведени во Русија за време на прекуграничен напад извршен во саботата навечер, соопшти денес украинската армија. Според извештаите, кои ги пренесоа украинските медиуми, инцидентот се случил во областа на селото Храбовске.
Повеќето од киднапираните жители се постари лица, додека руската страна сè уште не дала коментар за настанот. Британската агенција Ројтерс, повикувајќи се на локалните медиуми, истакнува дека не била во можност независно да ги потврди овие извештаи.
Во последните месеци, руската армија зазеде повеќе села во Сумската област и истовремено извршува чести гранатирања на градовите во регионот. Началникот на регионалната воена администрација, Олег Григоров, на Телеграм информира дека властите започнале евакуација на жителите од граничните села кои претходно одбиле да заминат, повикувајќи ги луѓето да ги следат наредбите за безбедно преместување.
