Окружниот суд во Добој го прифати предлогот на обвинителството и му одреди едномесечен притвор на 49-годишниот Р. С. од Дервента, кој се сомничи за тешко кривично дело обљуба врз дете помладо од 15 години.
Истрагата против овој 49-годишник ја отвори Окружното јавно обвинителство Добој, кое веднаш побара и одредување притвор поради тежината на кривичното дело, пренесува Klix.ba.
Како што соопштија од ОЈО Добој, случајот бил пријавен минатата недела, а се случил на едно речно излетиште.
„Осомничениот се товари дека на 8 август околу 14:45 часот, на излетиште на брегот на реката, ја повикал малолетната оштетена да ја вози по реката на СУП даска. Откако се оддалечиле, со оштетената извршил обљуба, знаејќи дека жртвата е малолетна и дека меѓу нив постои голема несразмера во зрелоста и возраста“, се наведува во соопштението на обвинителството.
Судот во целост го прифати предлогот на обвинителството, па осомничениот е сместен во притвор.
Едномесечниот притвор е одреден поради тоа што постои опасност неговото пуштање на слобода да претставува вистинска закана за нарушување на јавниот ред, имајќи ги предвид начинот на извршување и тешките последици од кривичното дело.
За кривичното дело обљуба врз дете помладо од 15 години, според законот, може да биде изречена затворска казна до десет години.
