Жена од Скопје пријавила во полиција дека била физички нападната во својот дом од нејзините два сина од претходниот брак, а според пријавата, инцидентот бил снимен со мобилен телефон.
Од Министерството за внатрешни работи информираат дека случајот бил пријавен на 19 јули околу 23:40 часот во СВР Скопје.
Според полицискиот билтен, жената навела дека околу 23:00 часот, додека била во домот со својот 36-годишен партнер и малолетното дете, пристигнале нејзините два сина од претходниот брак заедно со нивните девојки.
Таа тврди дека по нивното доаѓање следувал физички напад врз неа и нејзиниот партнер, а целиот настан бил сниман со мобилен телефон. При заминувањето, според пријавата, ѝ бил одземен и мобилниот телефон.
Од МВР соопштија дека се преземаат мерки за целосно расчистување на случајот и утврдување на сите околности.
Засега нема дополнителни официјални информации за евентуални приведувања или поднесени кривични пријави, а истрагата е во тек.
