Два мали браќа, на возраст од 4 и 2 години, починале откако биле пронајдени во автомобил за време на силен топлотен бран во Франција. Трагедијата се случила откако мајката ги однела децата на базен за да се разладат, а потоа застанала во супермаркет.
Според изјави на семејството, по враќањето дома таа излегла од возилото за да ги внесе намирниците, при што, како што тврдат, децата останале во автомобилот без надзор. Подоцна биле пронајдени без свест на задното седиште од паркираното возило изложено на високи температури.
Итните служби пристигнале на местото, но и покрај обидите за реанимација, лекарите можеле само да ја констатираат смртта. Локалните медиуми наведуваат дека причината за смртта најверојатно е топлотен удар и срцев застој.
Бабата на децата изјавила дека станува збор за трагична грешка и дека мајката била под голем стрес и преоптоварена со секојдневни обврски.
„Беше зафатена, има и други проблеми во животот… тоа беше несреќен случај“, изјавила таа.
Сепак, истрагата продолжува, а мајката се соочува со обвинение за убиство од небрежност. Доколку биде прогласена за виновна, може да добие затворска казна до 15 години, а во потешки околности и до 20 години.
