Кралски питон бил пронајден во дворот на основно училиште во Нов Белград, објавува српски „Телеграф“. Необичната глетка ги вознемирила присутните, особено откако било утврдено дека змијата е сè уште младенче, поради што се појавил страв дека во близина би можела да се наоѓа и поголема единка.
Питонот го забележал човек кој го чистел училишниот двор. Змијата била свиткана и видливо исплашена, а им шиштела на луѓето што се обидувале да ја земат.
Управата на училиштето веднаш реагирала и ги повикала надлежните служби, кои пристигнале и ја однеле змијата. При проверката било утврдено дека станува збор за младенче долго околу 40 сантиметри.
Токму сознанието дека питонот е толку мал предизвикало дополнителна загриженост кај присутните, кои се посомневале дека неговата мајка би можела да биде некаде во близина.
Сепак, според неофицијални информации, набргу се јавил човек кој потврдил дека змијата е негова и дека му паднала од ранецот. Оваа информација укажува дека питонот најверојатно бил домашен миленик кој случајно се нашол во училишниот двор.
Кралскиот питон е популарен домашен миленик
Топчестиот питон, познат и како кралски питон, е една од најпопуларните змии што се чуваат како домашни миленици. Причината за неговата популарност се мирниот темперамент и релативно едноставното чување во соодветни услови.
Овој вид потекнува од Западна и Централна Африка и спаѓа меѓу помалите видови питони. Возрасните единки најчесто достигнуваат должина од 1,2 до 1,5 метар, а женките генерално се поголеми од мажјаците.
Кралските питони обично се мирни и ретко покажуваат агресивно однесување, поради што често се избираат и од луѓе кои за првпат чуваат змии.
Нивното име е поврзано со карактеристичниот начин на одбрана. Кога се исплашени или се чувствуваат загрозени, се свиткуваат во компактна топка и ја повлекуваат главата кон средината, обидувајќи се да се заштитат.
