Илјадници граѓани излегоа на улиците на Приштина на 28 октомври, барајќи одговорност од институциите по убиството на 49-годишната Арлинда Зекај, која беше убиена со секира во близина на Пеќ. Случајот предизвика силен револт во косовската јавност, особено по информациите дека жената претходно повеќепати пријавувала семејно насилство и предупредувала дека нејзиниот живот е загрозен.
Демонстрантите порачаа дека институциите мора да преземат одговорност за пропустите во заштитата на жртвите и побараа насилството врз жените да се третира како национална итност.
„Молчењето го штити насилникот, не жртвата“ и „Државата има крв на рацете“ беа дел од пораките што можеа да се видат на протестот во косовската престолнина. Учесниците маршираа низ центарот на градот, барајќи конкретни мерки за спречување на насилството и одговорност од институциите кои, според нив, не успеале да ја заштитат Арлинда и покрај претходните предупредувања.
Арлинда Зекај беше убиена на 25 октомври, а за злосторството е осомничен нејзиниот девер. Според информациите објавени во косовските медиуми, таа во минатото неколкупати пријавувала семејно насилство и изразувала страв за сопствениот живот.
Особено вознемирувачки за јавноста се околностите на самиот ден на убиството. Арлинда повторно побарала полициска помош, по што нејзиниот поранешен сопруг бил приведен, а полицијата ја придружувала до нејзиниот дом. Сепак, само неколку часа подоцна таа била убиена.
Токму оваа хронологија предизвика бројни реакции и прашања за тоа дали надлежните институции ги сфатиле сериозно нејзините пријави и дали можело да се преземат дополнителни мерки за да се спречи убиството.
На протестот присуствуваа и членови на семејството на Арлинда, меѓу кои и нејзините сестри. Граѓаните носеа транспаренти со пораки против насилството врз жените, а во знак на револт беа фрлани црвена боја и димни средства.
Протестот беше проследен и со барања за политичка одговорност. Демонстрантите побараа оставки од министерката за правда Доника Грвала и министерот за внатрешни работи Џељаљ Свечља, оценувајќи дека институционалната одговорност не смее да се сведе само на соопштенија и осуди по секој нов случај на убиство на жена.
Според податоците објавени во косовските медиуми, Арлинда е осмата жена убиена во Косово од почетокот на годинава. Од 2010 година, во земјата се регистрирани најмалку 67 убиства на жени.
На случајот реагираше и косовскиот премиер Албин Курти, кој призна дека имало системски пропусти. Тој побара од надлежните институции да достават детални извештаи за случајот до 29 октомври, во 18 часот.
Организаторите најавија дека протестите ќе продолжат и денеска, со цел дополнително да се засили притисокот врз институциите и насилството врз жените да биде прогласено за национална итност.
Убиството на Арлинда Зекај повторно го отвори прашањето за ефикасноста на институционалната заштита на жените во Косово, особено во случаите кога насилството е претходно пријавено, а заканите по животот се документирани. Главното барање на демонстрантите е надлежните да одговараат за евентуалните пропусти и да се преземат конкретни мерки за да не се повторуваат вакви случаи.
