Српскиот претседател Александар Вучиќ уште еднаш ја потврди својата безрезервна поддршка за тенисерот Новак Ѓоковиќ, и покрај тоа што Ѓоковиќ неодамна јавно ја искажа поддршката за учесниците во блокадите на патиштата за време на политичките протести во Србија.
„Разговарав со Новак вечерта пред тој да излезе со својата поддршка. Тој ми се јави, но детали од разговорот нема да откривам. Не коментирав тогаш, ниту сега“, изјави Вучиќ за српските медиуми.
Претседателот додаде дека Ѓоковиќ останува национална икона и личност со огромна почит кај српските граѓани.
„Го поддржувам од сè срце. Тој е легенда на Србија. Може да ги поддржува моите политички противници, може и јавно да зборува против мене — нема да му замерам. Ако јас кажам нешто лошо за него, тоа би било глупаво и смешно“, нагласи Вучиќ.
Тој исто така потврди дека навивал за Ѓоковиќ на неговиот последен натпревар против Јаник Синер, истакнувајќи дека политичките разлики нема да ја променат неговата лична поддршка за најдобриот српски спортист.
