На социјалните мрежи се појави нова снимка од инцидентот со авионот на „Кроација ерлајнс“, кој за време на полетувањето од Сплит кон Франкфурт излетал од пистата и завршил на тревна површина, предизвикувајќи вознемиреност кај патниците.
Снимката, која брзо почна да се споделува на интернет, покажува дел од хаотичните моменти по инцидентот, додека патниците останале во авионот по ненадејното излетување од асфалтниот дел на пистата. Иако сцените предизвикаа големо внимание во јавноста, за среќа во инцидентот нема повредени.
Главниот истражител за воздушни несреќи Дарко Петрин изјави дека истрагата е во почетна фаза и дека во моментов се вршат детални технички анализи за да се утврди што точно довело до инцидентот.
Според првичните информации, авионот од засега непознати причини свртел налево додека забрзувал за полетување, по што излегол од пистата и завршил на тревната површина покрај неа. Причината за ова движење сè уште не е утврдена и ќе биде предмет на дополнителни анализи.
Истражителите веќе го завршиле увидот на местото на настанот, но клучниот дел од истрагата допрва следува. Запленети се таканаречените „црни кутии“ од авионот – снимачот на податоци за летот и снимачот на разговорите во пилотската кабина – кои треба да дадат одговори за тоа што се случувало во последните моменти пред инцидентот.
Според Петрин, обработката на податоците може да потрае, а конечните резултати од истрагата се очекуваат во наредните месеци.
Во несреќата нема повредени патници ниту членови на екипажот, што според надлежните е најважниот исход од целиот настан. Авионот „Ербас А220-300“ претрпел помали оштетувања на предниот дел, како и мала штета на левиот мотор.
Во следниот период ќе бидат извршени разговори со членовите на екипажот, а во истрагата ќе се вклучат и производителот на авионот и други воздухопловни експерти, со цел целосно да се утврдат причините за инцидентот што предизвика големо внимание во регионот.
