Новак Ѓоковиќ на несекојдневен и емотивен начин го одбележа 40. роденден на својата сопруга Јелена, приредувајќи спектакуларно светлосно шоу со дронови на небото над Атина.
Додека семејството престојувало на плажа заедно со нивните деца, Стефан и Тара, Јелена била изненадена од внимателно подготвената роденденска честитка што се појавила високо над нив.
Во текот на шоуто, на небото се испишале неколку пораки посветени на Јелена, а една од нив особено привлекла внимание: „Ти благодарам што си нашиот дом“.
Изненадувањето продолжило со впечатливи форми создадени од стотици дронови, кои го прикажале четиричленото семејство Ѓоковиќ, како и имињата на нивните деца, Стефан и Тара. Светлосниот спектакл завршил со роденденска честитка упатена до Јелена.
Гестот на најдобриот српски тенисер предизвика бројни позитивни реакции, а многумина го оценија како една од најубавите роденденски честитки што јавноста имала можност да ги види во последно време.
Јелена и Новак Ѓоковиќ се во брак од 2014 година и со години важат за еден од најпознатите и најследени спортски парови на Балканот. Во јавноста често зборуваат за семејните вредности, меѓусебната поддршка и важноста на заедништвото, а најновото изненадување уште еднаш ја покажа нивната блискост и силната семејна врска.
