Во близина на Мостар се развива сериозна криза откако пожарот на депонијата Уборак повторно се разгорел и почнал да се шири кон населените места, загрозувајќи ги домовите на жителите. Поради брзото ширење на огнената стихија, властите наредиле итна евакуација на населението.
Градоначалникот на Мостар, Марио Кордиќ, потврди дека ситуацијата се влошила до ниво кога е потребна целосна мобилизација на службите за заштита и спасување. Евакуираните граѓани се упатуваат кон прифатниот центар во Салаковац.
Според неговите изјави, постојат сомнежи дека пожарот бил намерно подметнат, при што биле запалени гуми на самата депонија. Тој ја оцени ситуацијата како исклучително сериозна, истакнувајќи дека постојат елементи кои укажуваат на свесно предизвикување на инцидентот.
„Тука има и елементи на тероризам бидејќи е прогласена вонредна состојба, а некој го подметнал пожарот“, изјави Кордиќ, додавајќи дека куќите биле директно загрозени, а дополнителна опасност претставува и блискиот резервоар за гориво.
Тој упати апел до граѓаните да останат смирени, да не подлегнуваат на политички манипулации и да соработуваат со институциите со цел откривање на сторителите.
Во своето обраќање, Кордиќ нагласи дека во текот на ноќта имало движење на лица околу депонијата, што дополнително ја комплицира истрагата. Властите засега не исклучуваат ниту една верзија за тоа како настанал пожарот.
Пожарникарските екипи продолжуваат со интервенција на терен, но нивната работа е отежната поради силен северен ветер кој го поттикнува ширењето на огнот.
Од Штабот за цивилна заштита соопштуваат дека во услови на вонредна состојба се преземаат сите неопходни мерки за заштита на населението, а наредбите мора да се спроведуваат без одложување. Дополнително е нагласено дека во вакви ситуации институциите имаат целосни овластувања за координација на сите активности на терен.
Во однос на квалитетот на воздухот, надлежните тврдат дека се врши континуиран мониторинг и дека засега нема причина за паника, иако граѓаните се предупредени да бидат внимателни и да ги следат официјалните информации.
Ситуацијата во Мостар останува тензична, а службите продолжуваат со напори за локализирање на пожарот и заштита на населението.
