На улица Херцеговачка во близина на комплексот „Белград на вода“, синоќа беше извршено брутално убиство – жртвата, 33-годишниот Ф.И. од Цетиње, е ликвидиран со еден куршум во челото, во присуство на сведоци, на место каде што вообичаено се движат семејства и деца.
Ф.И. бил познат на полицијата и на судските власти во регионот. Во Србија, тој бил на судење како помагач на Л.Т. по убиството на Б.М. во белградската населба Белвил. Покрај тоа, Црна Гора го барала со меѓународна потерница под сомнение за учество во создавање криминална организација, убиство и тешко убиство.
По бегството од домашен притвор во декември 2024 година, кога го отстранил електронскиот мониторинг, Ф.И. се криел користејќи фалсификувани странски документи.
Полицијата реагирала брзо и уапсила 21-годишен осомничен, Ѓ.З., кај кого биле пронајдени два пиштола. Истрагата е во тек, а мотивите сè уште не се официјално соопштени, иако сè упатува на ликвидација поврзана со пресметка меѓу криминални групи.
Настанот предизвика силни реакции во јавноста, особено поради фактот што убиството се случило на локација каде што често се движат деца и семејства, што дополнително ја зголемува загриженоста за безбедноста во главниот град на Србија.
