Дваесет и шест лица, меѓу кои ученици и вработени, биле пренесени во болница по инцидент со ослободување гас во приватното училиште „Кесарис“, во близина на Атина, Грција. Според информациите што ги објави „Екатимерини“, присутните почувствувале здравствени тегоби, вклучително и проблеми со дишењето.
Инцидентот се случил околу 10:30 часот, додека во училиштето се изведувале работи за одржување на базенот. Според првичните сознанија, при извршувањето на работите дошло до неправилна употреба на хемикалии, по што бил ослободен гас што предизвикал здравствени проблеми кај дел од присутните.
Како мерка на претпазливост, надлежните одлучиле да ги евакуираат основното училиште и градинката, со цел да се спречи дополнителна изложеност на гасот.
Децата и вработените згрижени во болници
Со амбулантни возила, 13 деца биле транспортирани во Детската болница „Аглаја Киријаку“ во Атина. Уште 13 вработени биле пренесени во болницата „Сотирија“.
Во здравствениот центар во Коропи биле згрижени и двајца работници кои биле ангажирани за одржување на базенот. Станува збор за мажи на возраст од 37 и 45 години.
Според досегашните информации, сите лица погодени од инцидентот се во добра здравствена состојба.
Пожарникарите го проверувале објектот
По пријавата, на местото пристигнале пожарникари кои извршиле проверки за да го утврдат изворот на ослободувањето на гасот и да проценат дали објектот е безбеден за повторно користење.
Надлежните служби продолжуваат со проверките и работат на утврдување на точните причини за инцидентот, како и на околностите под кои дошло до неправилната употреба на хемикалиите.
