ПРВ.мк
Балкан

ТИНЕЈЏЕР ОД МАКЕДОНИЈА ОСОМНИЧЕН ЗА ОБИД ЗА УБИСТВО ВО БЕЛГРАД: Пукал кон познато име од српското подземје

ТИНЕЈЏЕР ОД МАКЕДОНИЈА ОСОМНИЧЕН ЗА ОБИД ЗА УБИСТВО ВО БЕЛГРАД: Пукал кон познато име од српското подземје

Деветнаесетгодишен државјанин на Македонија е осомничен за обид за убиство на Ненад Алајбеговиќ, познат во белградското подземје под прекарот Али-бег.

Според информациите што ги објави српскиот „Курир“, по налог на Вишото јавно обвинителство во Белград, на младиот Македонец со иницијали А.А. му е определено полициско задржување до 48 часа.

Тој е осомничен дека на 8 август 2025 година пукал кон Алајбеговиќ, додека тој се наоѓал во својот автомобил на Нов Белград.

Според сомневањата на српските истражни органи, инцидентот се случил на улицата „Народни хероји“, каде што осомничениот наводно испукал повеќе куршуми од огнено оружје во правец на возилото.

Против 19-годишникот се води постапка поради сомнение за обид за убиство, како и за недозволено производство, држење, носење и промет на оружје и експлозивни материи.

Случајот е во надлежност на Вишото јавно обвинителство во Белград, кое ги презема потребните дејствија за расветлување на околностите на нападот.

Засега не се објавени дополнителни детали за мотивите за пукањето, ниту за евентуална поврзаност меѓу осомничениот и Алајбеговиќ.

Исто така, во првичните информации не е наведено дали Алајбеговиќ се здобил со повреди при инцидентот.

Надлежните српски органи продолжуваат со постапката, а одговорноста на осомничениот допрва треба да се утврди.