Попладнево во Будва се случил сериозен безбедносен инцидент, откако било пријавено пукање од огнено оружје, што предизвика силно присуство на полицијата и блокада на градот. Според неофицијални информации на локалните медиуми, постојат сомневања дека инцидентот имал смртен исход.
Полицијата засега не потврдува дека има убиено лице, но извори наведуваат дека на местото на настанот биле распоредени голем број полициски екипи, додека сите приоди кон Будва се под засилена контрола. Во тек е интензивна потрага и истрага за расчистување на настанот.
Итните служби реагирале брзо, но според достапните информации, повредите на ранетиот маж биле исклучително тешки и фатални. Мотивот за пукањето, како и идентитетот на лицата вклучени во инцидентот, засега не се познати.
Подоцна, Полициската управа соопшти дека телото на лице со иницијали С. М., жител на Будва, било пронајдено во селото Марковиќи. Од полицијата информираат дека се преземаат сите законски мерки и дејствија за утврдување на околностите под кои настанала смртта.
Надлежните најавуваат дека јавноста ќе биде навремено информирана штом ќе се соберат повеќе официјални и проверени информации за случајот, кој внесе вознемиреност меѓу жителите и туристите во градот.
