Најмалку четири лица се повредени, а околу 100 патници биле евакуирани со хеликоптери по сериозна несреќа на жичарница во северозападниот дел на Италија, соопштија локалните власти.
Инцидентот се случил во близина на селото Макуњага, во регионот Пиемонт, кога две кабини на жичарницата удриле во станиците при пристигнување, информира италијанската противпожарна служба. Според првичните информации, една од кабините не забавила навреме и се судрила со заштитната ограда на станицата.
Повредени биле тројца патници од горната кабина, како и оператор на жичарницата кој се наоѓал на станицата. Дел од италијанските медиуми наведуваат дека вкупно шест лица побарале лекарска помош, но надлежните уверуваат дека нема тешко повредени и дека ничиј живот не е во опасност.
По несреќата, жичарницата била веднаш запрена, а околу 100 лица – меѓу кои деца и странски туристи – останале заглавени на горната станица на планината Монте Моро, на надморска височина од околу 2.800 метри. Поради сложените услови, спасувачките екипи организирале евакуација со хеликоптери, која траела со часови.
Генералниот директор на операторот „Макуњага Траспорти е Сервизи“, Филипо Бесоци, за агенцијата ANSA изјави дека станува збор за технички проблем при пристигнување на кабината и нагласи дека ситуацијата била ставена под контрола без сериозни последици.
Жичарницата, која е изградена во 1962 година и реновирана пред две години со инвестиција од околу два милиони евра, ќе остане затворена додека трае истрагата. Италија и претходно се соочувала со тешки несреќи на жичарници, што повторно го отвора прашањето за безбедноста и одржувањето на ваквите системи.
