Дванаесетгодишно момче заврши на интензивна нега откако било тешко повредено во сообраќајна несреќа со електричен тротинет во Пеанија, во југоисточниот дел на Атина.
Според информациите од грчката полиција, несреќата се случила во саботата на раскрсница, кога момчето, управувајќи електричен тротинет, не застанало на знак „стоп“ и се судрило со автомобил кој поминувал по патот.
Првичните сознанија укажуваат дека детето не носело заштитен шлем во моментот на несреќата, а истражителите проверуваат и информации дека можеби користело мобилен телефон додека возело.
По инцидентот, момчето било итно пренесено во Детската болница „Агиа Софија“ во Атина, каде што е хоспитализирано на Одделот за интензивна нега. Лекарите информираат дека неговата состојба засега е стабилна и дека не се наоѓа во животна опасност.
Несреќата повторно ја отвори дебатата за безбедноста при користење електрични тротинети во Грција, каде бројот на вакви инциденти продолжува да расте.
Според здравствените власти, само во текот на мај биле регистрирани повеќе од 80 случаи на повредени деца поврзани со електрични тротинети, додека болниците бележат и зголемен број повредени возрасни лица.
Надлежните институции повторно апелираат до граѓаните, особено до малолетниците, строго да ги почитуваат сообраќајните правила и задолжително да користат заштитна опрема при управување со електрични тротинети.
