На најфреквентниот граничен премин на патот кон Грција, Евзони, утрово туристите чекаат најмногу околу еден час. Тие поминуваат и низ новиот ЕЕС (EES) систем, но не сите на ист начин. Еве кој мора да се слика, а кој остава само отпечаток од прст и побрзо го поминува новиот систем за евиденција на влезови и излези во Шенген зоната.
Патниците кои ја преминаа границата во раните утрински часови наведуваат дека задржувањето на граничниот премин Евзони за влез во Грција било меѓу 40 и 65 минути.
Кој се слика, а кој остава отпечаток?
„Сликањето се прави главно само за оние кои сè уште не се внесени во ЕЕС системот, додека останатите поминуваат побрзо, најчесто само со отпечаток од десната рака“, наведуваат туристите кои веќе ја поминаа грчката граница, а пренесува страницата „Пат до Грција“.
Потсетуваме, целосната примена на ЕЕС системот на границите на Шенген официјално започна на 10 април, но грчките власти, како што беше најавено и претходно, се подготвени привремено да го суспендираат кога фреквенцијата и бројот на возила на граничниот премин се огромни.
Сепак, важно е да се напомене дека изминатите денови долгите колони на најфреквентната грчка граница Евзони не беа само последица на примената на ЕЕС системот за контрола на патниците, туку и поради почетокот на сезоната, смената на туристите, празниците и зголемениот интензитет на сообраќај во деновите од викендот.
Кога има најмалку метеж на грчките граници?
Како што претходно истакнаа експертите од туристичкиот сектор, најголемите гужви традиционално се создаваат во периодот меѓу 6 и 15 часот. За оние кои во Грција патуваат со сопствен автомобил, се советува користење на алтернативните гранични премини, како што се Дојран и Меџитлија, кои туристичките автобуси главно не ги користат.
