Рекордно нискиот водостој на Дунав повторно откри делови од германски воени бродови потопени пред повеќе од осум децении кај Прахово, во источна Србија.
Станува збор за пловила што германските сили намерно ги потопиле во 1944 година, при повлекувањето од Балканот, за да не бидат запленети од Црвената армија.
Поради екстремната суша и значителниот пад на нивото на реката, остатоците од бродовите повторно излегоа над површината, создавајќи необична слика која го привлече вниманието на јавноста и историчарите.
Според информациите на „Ројтерс“, потопените пловила и денес претставуваат потенцијална опасност за речниот сообраќај, особено во периоди кога Дунав достигнува исклучително низок водостој.
Регионот кај Прахово е познат по големиот број потопени германски воени бродови, кои во изминатите години повеќепати стануваа видливи за време на продолжени сушни периоди.
