Тешка трагедија ја потресе јавноста кон крајот на септември 2025 година, кога Милена Јовичиќ (38) од Богатиќ го загуби животот, а нејзиниот тригодишен син беше тешко повреден, откако во нив удри пијан возач додека тие мирно шетале. Четири месеци подоцна, сопругот на Милена, Немања Товиловиќ, сè уште чека да започне судскиот процес и отворено зборува за болката и тагата со кои живее по загубата на сопругата.
Несреќата се случила кога Милена го туркала својот син во трицикл, враќајќи се од продавница кон својот дом во Богатиќ. Во тој момент, возачот Д.Н. (32), под дејство на алкохол, со автомобил налетал директно на нив.
Од силината на ударот, Милена била одфрлена околу 30 метри и починала на самото место. Нејзиниот син се здобил со контузија на белите дробови и повреди на црниот дроб. Наместо да помогне, возачот избегал од местото на несреќата. Според информациите, тој заминал на работа и на работодавецот му рекол дека автомобилот му бил украден и уништен. Подоцна, при одење во полиција заедно со шефот, ја признал вистината. Алкотестот покажал 1,43 промили алкохол во крвта.
„Колку што сум информиран, сите вештачења се завршени и сега чекаме да започне судењето. Одлучивме кривично да го гониме. Од снимките и доказите се гледа дека воопшто не кочел – ги удрил и си заминал“, вели Немања.
Детето било реанимирано: „Се гушеше, го вратија во живот“
Немања раскажува дека состојбата на детето била исклучително тешка.
„Кога Итната помош го презеде, тој се гушеше. Му го извадија јазикот и го реанимираа пред да го префрлат на Институтот за мајка и дете. Освен повредите на белите дробови и црниот дроб, беше цел во хематоми“, раскажува таткото.
Денес, детето е пуштено дома и се опоравува, но поради здравствената состојба и редовните контроли сè уште не може да оди во градинка.
„Невработен сум бидејќи го чувам синот. Мајка ми ми помагаше, но и таа имаше операција на ’рбетот, па најчесто сум сам. Благодарен сум на сите што ни помогнаа. Во февруари имаме контрола и се надевам дека ќе добиеме зелено светло да тргне во градинка“, вели Немања.
„Се борам поради децата“
Немања признава дека животот без сопругата е исклучително тежок.
„Во еден момент останав сам, но морам да се борам поради синовите. Постариот е синот на Милена од првиот брак и самиот одлучи да остане со мене. Милена рано останала сама со него, се борела и никогаш не се откажала – нема ни јас да се откажам.“
Тој открива дека најтешкиот момент бил кога морал да му ја каже вистината на помалиот син.
„Го однесов на гробишта и му реков дека мама отишла кај Бог. Не сакав да го лажам. Во куќата има нејзини слики, тој ги бакнува, некогаш сам бара кандило и вели дека ќе се моли за мама. Најтешко е кога одиме во Богатиќ – истрчува од автомобилот и пред куќата вика ‘мама’. Се смирува дури кога ќе го види брат му.“
„Времето не лечи ништо“
Празниците, вели тој, биле особено болни.
„Првпат бевме само ние тројца. Болката не поминува, човек само учи да живее со неа. Милена беше мојата љубов.“
„Никој од нивната фамилија не ни се јави“
Немања открива дека семејството на осомничениот никогаш не ги контактирало.
„Ги разбирам, веројатно се плашат. Не им посакувам ништо лошо. Но никогаш нема да го заборавам моментот кога адвокатот на осомничениот ме праша дали жена ми ги познавала сообраќајните прописи. Тој ја прегази додека го туркаше нашето дете.“
Полицијата соопшти дека Д.Н. (32) е уапсен поради тешко дело против безбедноста во сообраќајот и непружање помош на повредено лице. Жената починала на лице место, а детето било тешко повредено.
Жителите на Богатиќ за Милена имаат само зборови на почит, а на местото на несреќата со денови оставаа цвеќе – нем сведок на трагедија што засекогаш промени еден живот.
