Балканските транспортни компании се соочуваат со сериозна криза откако неколку земји од Европската Унија во изминатиот период депортираа околу 100 возачи на камиони, додека за уште најмалку 100 е започната постапка за протерување. Причина за ваквите мерки се заострените контроли и строгото спроведување на европските правила за престој и работа на возачи од трети земји.
Според информации од транспортниот сектор, најчесто се работи за прекршување на правилата поврзани со дозволениот престој, неправилна документација, како и несоодветна примена на прописите од таканаречениот „Пакет за мобилност“. Инспекциите во неколку земји-членки значително се интензивирани, а казните стануваат сè поригорозни.
Превозниците предупредуваат дека ваквата состојба може да доведе до сериозни застои во меѓународниот транспорт, откажување на договори и дополнителни финансиски загуби. „Недостигот од возачи веќе е хроничен проблем, а со овие депортации ситуацијата станува драматична“, велат претставници на здруженијата на превозници.
Особено загрижува фактот што многу возачи се затекнати на терен без можност брзо да се вратат на работа, додека компаниите се соочуваат со високи казни и трошоци за замена на персоналот. Дел од фирмите веќе најавуваат намалување на рутите кон одредени европски земји.
Превозниците бараат итни разговори со надлежните институции и дипломатска интервенција, со цел да се изнајде решение и да се обезбеди појасна и пофлексибилна примена на правилата. Во спротивно, предупредуваат дека целиот транспортен сектор на Балканот може да се соочи со сериозен удар, чии последици ќе ги почувствуваат и стопанството и граѓаните.
