Во еден од најголемите удари против шверцот на тутун на Балканот, во Слободната зона „Пристаниште Бар“ се уништени повеќе од 1.745.000 килограми тутунски производи, потврди Владата на Црна Гора. Операцијата се одвивала во периодот од 23 јуни до 16 септември, под строга контрола и со учество на домашни и меѓународни служби.
Според официјалните податоци, во акцијата биле уништени 130.003 кутии цигари, 526 кутии сечен тутун, 1.134 кутии тутун за наргиле и шест кутии електронски цигари. Вкупната количина на отпад што завршила на депонија надминала два милиони килограми, што ја прави оваа акција една од најобемните во историјата на земјата.
Акцијата била внимателно надгледувана од Царинската управа, Полициската управа, британската царинска служба HMRC, како и од компанијата „Депонија“ д.о.о. Подгорица, со која бил потпишан договор за уништување на нелегалните производи на 20 јуни.
Премиерот Милојко Спајиќ истакна дека со оваа акција државата избегнала финансиска штета од стотици милиони евра и испратила јасна порака дека нема толеранција кон шверцот. Според него, околу 90 проценти од запленетите цигари – со пазарна вредност од 200 милиони евра – се уништени, со што Црна Гора избегнала, како што рече, „многу лошо сценарио“ за својата економија и меѓународен углед.
Со оваа операција, Црна Гора направи голем чекор во зацврстувањето на контролата на своите гранични и царински системи, испраќајќи силен сигнал дека борбата против нелегалната трговија е меѓу највисоките приоритети на државата.
