Педесет и четиригодишна жена е уапсена во Солун, откако полицијата открила дека во својот дом чувала повеќе од 200 животни, меѓу кои кучиња, мачки и кози, соопшти грчката полиција.
Жената била приведена вчера попладне, по инцидент во кој, наводно, упатила закани кон 35-годишна жена од Алжир. Случајот предизвикал итна реакција на полициските службеници, пренесува грчкиот медиум „Прототема“.
Во текот на истрагата, спроведена од полицајците на одделот Терма, биле откриени размерите на случајот. Според утврденото, Гркинката во својот дом чувала околу 120 кучиња, 70 мачки и десетина кози.
Надлежните утврдиле дека животните биле сместени без соодветни, здрави и удобни услови, со што била загрозена нивната благосостојба.
Против жената е поднесена соодветна пријава поради упатените закани и сомнение за прекршување на законските одредби за заштита на животните, објави „Танјуг“.
