Од Агенцијата за европски земјоделски субвенции (ОПЕКЕПЕ), заедно со Министерството за земјоделство и Министерството за финансии на Грција, најавено е дека грчките земјоделци ќе добијат вкупно 3,7 милијарди евра до крајот на 2025 година, што е најголем износ во историјата.
Според кабинетот на вицепремиерот Костис Хаѕидакис, за 2025 година од ОПЕКЕПЕ се планирани 3,3 милијарди евра, наспроти 2,7 милијарди евра лани. Поголемиот дел од средствата се од вториот столб на Заедничката земјоделска политика, насочени кон модернизација на земјоделските култури и стопанства.
До 26 ноември биле исплатени 1,9 милијарди евра, а од денеска започнува авансна исплата за:
- Основна поддршка: 363 милиони евра
- Програма за рурален развој: 119 милиони евра
- Обесштетувања за болести кај животните: 56 милиони евра
До крајот на годината се очекува исплата на останатите 1,2 милијарди евра, со што декември ќе стане месец на „суштинска поддршка за земјоделскиот и сточарскиот сектор“.
Меѓутоа, земјоделците изразија незадоволство поради високите трошоци на производство и побараа загарантирани цени за нивните производи. На состанокот на Грчкиот координативен комитет, одржан во неделата, донесена е одлука од 30 ноември да започнат блокади низ целата земја, со постепено проширување до 5 декември.
