Црногорската полиција го уапси 61-годишниот Д.С. од Даниловград, осомничен дека две години војувал во Луганск во рамките на вооружени формации поврзани со Русија. При претрес на неговиот дом биле откриени воздушна пушка без документација, воени униформи, панцири, шлемови, опрема на Козачкото братство, комуникациски уреди, СИМ-картички, официјални документи и дури 1,5 милион евра.
Полицијата запленила и документи што укажуваат на поседување недвижен имот, членски картички, доказ за учество на фронтот, како и странски пасоши и уверенија за државјанство. Д.С. е осомничен дека од 2023 до 2025 година учествувал во активностите на вооружени формации во рамките на руската војна против Украина.
Во акцијата, која траела 24 часа, биле извршени претреси на 13 локации во Даниловград, Никшиќ и Подгорица. Пронајдени се 24 парчиња огнено оружје, над 1.000 куршуми, рамки, девет ножеви, сабји, бајонети, униформи, знамиња и други предмети поврзани со можни кривични дела.
Полицијата сè уште трага по едно лице, Ж.О., додека во адвокатската канцеларија на Ѓ.В. не биле пронајдени забранети предмети.
