Србија во последните години значително ги зајакна односите со Израел и, според „Џерузалем пост“, станува еден од неговите најважни партнери во Европа, особено во областа на одбраната и безбедноста.
Весникот наведува дека соработката дополнително се интензивирала по почетокот на војната меѓу Израел и Хамас, во период кога односите на Израел со дел од европските земји се влошија поради конфликтот во Газа.
Според извештаи на „Балкан инсајт“ и „Хаарец“, израелските власти побарале муниција од Србија веднаш по нападот на Хамас во октомври 2023 година, а Белград издал дозвола за извоз во рок од неколку дена. Испораките продолжиле и во текот на следната година, при што вредноста на српскиот извоз на муниција во Израел значително се зголемила.
Во февруари 2024 година, израелскиот премиер Бенјамин Нетанјаху јавно му се заблагодари на српскиот претседател Александар Вучиќ за, како што рече, „непоколебливата поддршка“ и го нарече „вистински пријател на Израел“.
Покрај извозот на муниција, двете земји ја продлабочуваат и воено-техничката соработка. Во текстот се посочува дека Србија има договор со израелската компанија „Елбит Системс“ вреден околу 1,6 милијарди долари, кој предвидува производство на извидувачки и борбени беспилотни летала, развој на прецизна муниција, артилериски ракети со долг дострел и системи за електронско војување.
Белград претходно набави и повеќе израелски воени системи, меѓу кои беспилотни летала „Хермес 900“ и ракетни системи ПУЛС, а во 2026 година беше потпишан и договор за олеснета размена на разузнавачки и одбранбени информации.
Според анализата, Србија преку соработката со Израел се обидува да ја диверзифицира својата зависност од традиционалните снабдувачи со оружје, како Русија и Кина, додека Израел настојува да ги прошири своите партнерства и синџирите на снабдување.
Во текстот се наведува и дека развојот на овие односи внимателно се следи во регионот, особено поради засилената воена соработка на Турција со Хрватска, Албанија и Косово, што, според анализата, предизвикува загриженост кај српските власти.
