Воведувањето на новите комплети за прва помош во возилата во Грција, кои се дополнети со нови ставки и со тоа се поскапи, е одложено. Иако примената беше најавена за 1 јули годинава, локалните медиуми пренесуваат дека според министерската одлука, новиот рок е 1 јануари 2027 година.
Ова продолжување им дава повеќе време на возачите да ги опремат своите возила, а на пазарот му овозможува да обезбеди доволно материјали.
Новини по цели 50 години
Грција одлучи по речиси 50 години (од 1978 година) значително да ја осовремени својата авто-аптека. Наместо досегашните 5 артикли, од јануари 2027 година комплетот ќе содржи дури 16 ставки.
Клучни новини во грчката прва помош:
- Термо-ќебе за спасување: Рефлектира над 90% од топлината за спречување на хипотермија.
- Специјализирани завои и фластери: Сет од 14 самолепливи фластери и стерилни завои со перничиња во специфични димензии.
- Облога за изгореници: Наменска стерилна газа (60x80 cm) за големи повреди.
- Атрауматски ножици: Со тап врв за безбедно сечење на облека.
- Заштитна опрема: 4 пара медицински ракавици (винил/нитрил) и 2 медицински маски за лице.
- Хигиена: Влажни марамчиња за чистење на кожата.
- Упатство со пиктограми: За брза и правилна реакција при итни случаи.
Казна од 30 евра и повисоки трошоци
Секој возач кој нема да го поседува овој комплет по почетокот на 2027 година, ризикува казна од 30 евра.
Истражувањата покажуваат дека новиот комплет ќе биде значително поскап:
- Сегашен комплет: чини околу 3 евра.
- Нов комплет (16 ставки): ќе чини околу 31 евро.
Ова значи дека авто-аптеката ќе биде 10 пати поскапа од сегашната. Компаниите за рентакар и лизинг не сакаат да го преземат овој трошок (кој би изнесувал околу 11 милиони евра), па се очекува тој да падне на товар на корисниците преку повисоки цени за изнајмување.
Важно за рокот на траење
Стерилните материјали во комплетот најчесто имаат рок од 5 години, додека одредени ставки мора да се менуваат на секои 2 години. Возачите се одговорни комплетот да биде лесно достапен во возилото и сите материјали да бидат во рок на траење.
