Во утринските часови над Чањ, Црна Гора, избувна масивен пожар, чиј густ чад се рашири до крајбрежните плажи. Огнените јазици веќе го зафатија просторот над Краличината плажа, на ридот Дубовица, каде што има густо зеленило, а мештаните со страв гледаат како пламените се приближуваат кон фабриката „Техногас“, стравувајќи од можно експлозивно сценарио.
Снимките од утрово прикажуваат како туристите на плажата во Чањ, меѓу лежалки и сонцобрани, собираат работи и заминуваат, додека некои и понатаму се капат, без да ја напуштат водата, иако чадот од блискиот пожар веќе ја прекрива околината.
Огнот се шири од два правци: од Дубовица и од правец на каменоломот, каде што се спушта опасно блиску до куќите – само околу 100 метри ги делат од пламените. Силен северен ветер дополнително го разгорува и го отежнува гаснењето.
Постои сомневање дека пожарот започнал поради запален автомобил на магистралата. Целиот Чањ одекнува од сирените на пожарникарските возила кои се борат со стихиската закана.
Сателитски податоци покажуваат дека досега се уништени околу 5 квадратни километри. Освен топлото време, ветерот е главен фактор што го поттикнува огнот, со постојана промена на насоката, што го зголемува ризикот од проширување.
Граѓаните на Петровац изразуваат особена загриженост дека пожарот може да стигне до складиштето на „Техногас“. Тие предупредуваат дека во случај пламените да допрат до објектот, може да настане разорна експлозија. Засега, ветерот го насочува пожарот кон Куфини, но според мештаните, подоцна може да се сврти кон Петровац, со што ризикот би станал уште поголем.
Мештаните сметаат дека реакцијата на властите е недоволна и апелираат итно да се мобилизираат сите можни ресурси за спречување на поголема трагедија.
