Црногорската полиција спроведе голема акција против организиран криминал во Подгорица, при што е уапсен 24-годишниот Лука Тодоровиќ, за кого се сомнева дека е поврзан со една високоризична организирана криминална група.
При контролата и претресите на повеќе локации биле пронајдени над 4,2 килограми наркотични средства, меѓу кои околу еден килограм кокаин, околу 3,2 килограми марихуана и 190 таблети синтетичка дрога МДМА (екстази).
Од Управата на полицијата на Црна Гора информираат дека акцијата била насочена кон сузбивање на дејствувањето на организирани криминални групи, спречување на нелегална трговија со дрога и откривање лица поврзани со улична дистрибуција на наркотични средства.
Според полицијата, Тодоровиќ бил приведен по наредба на државен обвинител од Вишото државно обвинителство во Подгорица. При првичната контрола кај него била пронајдена поголема пластична кеса со три пакувања во кои имало околу еден килограм кокаин.
По налог на надлежен суд, полицијата извршила претреси на повеќе објекти и возила кои ги користел осомничениот, меѓу кои и семејната куќа во местото Рогами.
Во рамки на акцијата биле одземени и шест автомобили, меѓу кои и блиндиран автомобил „Ауди“, чии регистарски ознаки дополнително ќе бидат предмет на проверки.
При претресите биле пронајдени и дигитални ваги, како и поголема сума пари за која надлежните ќе утврдуваат дали потекнува од нелегални активности.
Од полицијата најавуваат дека истрагата продолжува со цел целосно расчистување на случајот и утврдување на евентуалната улога на осомничениот во мрежи поврзани со организиран криминал.
