По изборниот пораз на политичката опција на Александар Вучиќ, во Србија се отвора прашањето за користењето на луксузните државни резиденции од страна на поранешните високи функционери.
Според информации на српскиот портал „Nova.rs“, Александар Вучиќ, Ана Брнабиќ и Томислав Николиќ би можеле наскоро да останат без државните вили на Дедиње, кои ги користеле за време на извршувањето на своите функции.
Извор од српската влада тврди дека тројцата ќе мора да се вратат во своите приватни домови кога новите државни функционери ќе ги преземат должностите.
Исклучок би бил можен доколку безбедносните служби проценат дека нивната сигурност е загрозена.
Брнабиќ во вила од 750 квадратни метри
Ана Брнабиќ од ноември 2020 година ја користи таканаречената Јованкина вила на Дедиње, со површина од околу 750 квадратни метри.
Во 2024 година српската влада донела уредба со која објектот добил статус на репрезентативна зграда за претседателот на Народното собрание.
Вучиќ користел објект од 1.700 квадратни метри
На Александар Вучиќ му била ставена на располагање вилата „Бокељка“, со површина од околу 1.700 квадратни метри, која според медиумските информации главно ја користел за службени состаноци и приеми.
Поранешниот претседател Томислав Николиќ, пак, користи државна вила на Дедиње уште од 2012 година.
Неговото понатамошно користење на резиденцијата било овозможено со измени на прописите поврзани со функцијата што ја извршувал.
Засега нема официјална одлука за иселување. Според изворите на српските медиуми, конечниот исход ќе зависи од новата власт и евентуалните процени на безбедносните служби.
